Snúin aftur

Jæja, mikið var nú gaman að lesa í gegnum gömlu færslurnar mínar og skyggnast inn í hugarheim FortíðarMaríubjöllu.

Ég hugsa að ein ástæðan fyrir því að ég hætti að blogga í fyrra var að stuttu eftir seinustu færsluna fór allt í köku – bókstaflega! Ég hætti að hreyfa mig, datt í sukk og fór öll í vitleysu þarna úti. Þótt ótrúlegt megi virðast þyngdist ég bara um 4 kíló en að á móti kemur að hreyfingarleysið gerði það að verkum að allir vöðvar rýrnuðu svo ég varð öll slöpp og ógeðsleg líka, svo eins og ég hef áður sagt segja kílóin kannski ekki mikið miðað við ástandið á mér þegar ég mætti aftur á klakann um jólin.

77 kíló var talan þegar verst lét, takk fyrir og góðan daginn.

Sem betur fer var ég farin að þrá að hreyfa mig og komast í form svo að eitt af því fyrsta sem ég gerði var að kaupa kort í ræktina og var dugleg að mæta. Kílóin mjökuðust hægt og bítandi af og um vorið var ég 6 kílóum fátækari og leit mun betur út.

En svo kom sumarið með allar sínar freistingar, grillveislur og bjór hverja helgi og sólböð þess á milli. Ég hélt þó áfram að mæta í ræktina nokkrum sinnum í viku, enda var það algjörlega orðin rútína hjá mér núna og orðið alveg ómissandi, en vigtin stóð í stað og mér fannst ekkert vera að gerast allt sumarið.

Um haustið fór ég að taka mig aðeins meira á, mætti oftar í ræktina og reyndi að hugsa um mataræðið, en þrátt fyrir það var ég sífellt að rokka milli 70 og 71 kíló, og þannig er staðan í dag. 

Nú ætla ég að gera enn eina tilraunina til að taka mig á. Ég held að það að skrifa hugsanir sínar svona niður eigi eftir að hjálpa svo ég ætla að vera dugleg að blogga hvort sem einhver fylgist með eða ekki, þetta verður aðallega fyrir mig, en auðvitað er það visst spark í rassinn að vita að einhver sé að lesa svo þið megið endilega láta mig vita af því

Ég hef þetta ekki lengra í bili þar sem ég vildi bara aðeins fara yfir liðið ár núna, en á morgun skal ég koma með nýja færslu um daglega rútínu og hvað þarf að bæta

-Maríubjalla

Október

Þá er október genginn í garð, jarhérna hvað tíminn líður fljótt..

Mér hefur ótrúlegt en satt tekist að halda mér í 72 kg, þó að ég sé auðvitað ekki sátt með að vera svo þung.. en á meðan ég þyngist ekki meira sleppur þetta.  Lét loksins verða af því að kaupa kort í ræktina og er búin að mæta nokkrum sinnum, það var aðeins of gott að fara loksins að hreyfa sig almennilega aftur. Ég er að vísu líka alveg búin að vera dugleg í óhollustunni, en ég ætla bara að lifa lífinu hérna en fylgjast samt alltaf með vigtinni og grípa í taumana þegar hún fer að mjakast upp á við. Það er auðvelt að trappa sig niður um leið og talan fer að hreyfast í þá átt sem maður vill ekki, svo að mér ætti að takast það að koma ekki heim feitari en ég var þegar ég kom út, sem er jú markmiðið Svo eftir jól byrjar alvöru átakið, en ég ætla mér að verða fín og flott á útskriftinni í sumar, og hana nú!

Hugsa að ég fari að skrifa hérna oftar til að minna mig á að hugsa aðeins betur um hvað ég set ofan í mig. Ég er samt reyndar búin að vera mjög dugleg í þessari viku, kominn föstudagur og ég er ekki búin að borða neitt nammi síðan á sunnudaginn Það er alveg mikið sagt miðað við að ég var alveg að borða eitthvað nammi nánast á hverjum degi.. úff. Eeen þetta verður bara eitthvað sem ég leyfi mér núna á meðan ég er að njóta þess að vera til, en svo verður tekið í taumana

- Maríubjalla, sem nennir ekki að spá í hvað hún borðar.. þangað til talan fer upp

Enn á lífi

Það er búið að vera svo rosalega mikið í gangi núna að ég algjörlega steingleymdi þessu bloggi, obbossí.

Ég er flutt út núna og markmiðið að koma ekki heim feitari en ég fór út stendur ennþá og gengur vel eftir næstum 4 vikur. Ég keypti mér vigt sem mælir þyngd og hlutfall líkamsfitu, vatns og massa og vigta mig annan hvern dag svo ég ætti að ná að fylgjast vel með.  Ég ákvað að vera ekki að stressa mig á vigtinni á meðan ég er úti því þá vill maður lifa lífinu sem best án þess að fá samviskubit eftir hvern bjór Svo ég ætla því aðeins að passa að ég fari ekki yfir 72 kg hérna úti.

Sem minnir mig á það. Ég komst að því að vigtin heima sýndi 2 kg minna en maður er í raun, aldeilis frábært! Svo ég hef lifað í blekkingu í allt sumar, en það er svosem kannski bara ágætt Þannig að ég fór út 72 kg en var 71,4 síðast þegar ég vigtaði mig sem er ágætt miðað við magn af bjór og óhollustu sem ég hef innbyrt síðustu vikur Það sem er aðallega að hjálpa er hvað ég er að labba mikið hérna, ég labba hvert sem ég fer svo að ef ég væri ekki að borða hvað sem ég vildi væri ég örugglega að grennast, hehe. En ég ætla ekki að hugsa um það.

Svo að þetta er satusinn í dag. Ég er hamingjusöm og sátt með lífið, set megrun á hold en þó aðeins passlega svo ég verði ekki bolti um jólin þegar ég kem heim   Ég stefni nú samt að því að kaupa kort í ræktina á morgun þar sem er boðið upp á spinningtíma og pilates, hlakka mikið til að verða alveg búin á því aftur

Ég ætla samt að halda áfram að posta hérna inn til að halda mér alveg við efnið og vona bara það besta

- Maríubjalla, sem nýtur lífsins í útlöndum svo um munar.

Nenn

Þyngd: 68 kg

Er ekki alveg nógu ánægð með mig þessa dagana. Finn að ég hef fitnað þó að vigtin segi það ekki, og er frekar ósátt með sjálfa mig.. Finnst ég ekki geta verið í fötum lengur því ég virka feit í þeim sem ég meikaði samt alveg fyrr í sumar þegar ég var jafn þung. Það segir bara enn og aftur að það er ekki alltaf að marka töluna á vigtinni..

Ég þarf að fara að finna nennið aftur.. Er orðin ótrúlega löt að hugsa um hvað ég borða og nenni ekki að pæla í þessu lengur. Það er ekki alveg nógu gott hugarástand svo það er bara eins gott að það fari að breytast áður en ég fitna enn meira því þá verður þetta bara endalaus vítahringur.

Á meðan geymi ég bara fötin inní skáp og dreg fram tjaldið ;)

- Maríubjalla, sem leitar að nenninu

:)

Þyngd: 68 kg

Tók góða brennslu í gær í ræktinni yfir So you think you can dance, ég elska þegar eitthvað skemmtilegt er í sjónvarpinu því þá getur maður alveg gleymt sér yfir því, var að í einn og hálfan tíma án þess að taka eftir því, algjör snilld   Verst ég klúðraði því svo þegar ég kom heim um 10 leitið með því að fá mér tvær brauðsneiðar, ekki alveg nógu gott.. Ég ætlaði að fá mér bara skyr og fara svo bara upp í rúm því ég var svo þreytt en var svo boðið á kaffihús svo ég varð að borða eitthvað annað svo ég yrði ekki hugurmorða eða myndi missa mig yfir natchosinu  

Gleymdi svo alveg tímanum og var ekki komin heim fyrr en 1, og þurfti þá að vakna 6 tímum seinna.. En ég er öll að koma til eftir kaffibollann og svo er það bara snemma að sofa í kvöld í staðinn  

Ég er farin að sjá pínu eftir því að hafa lofað að vinna í 12 tíma fjóra daga í þessari viku, en vanalega er ég bara tvisvar í viku svo lengi, þá er ansi erfitt að drífa sig í ræktina og verður örugglega erfiðara eftir því sem á líður vikuna.. En vinkona mín ætlar að koma með mér í kvöld og ég ætla að reyna að draga hana með mér hina dagana líka, því þá er svo miklu auðveldara að nenna að mæta

En ég er ennþá jákvæð yfir því að ná að komast í 67 kíló áður en ég fer út, svo fer spenningurinn að fara með mann svo maður missir alla matarlyst hvort eð er hehe. En það er allavega markmiðið næstu daga

- Maríubjalla

Þreyta

Þyngd: 68 kg

Mér tókst víst að halda mér í skefjum þrátt fyrir pizzuna á föstudaginn hehe

Ég get nú ekki sagt að ég hafi verið dugleg um helgina samt, fór reyndar í fína rækt fyrir hádegi á laugardaginn en hélt svo kveðjupartý um kvöldið með tilheyrandi þreytu og nammiáti á sunnudaginn Svaf mjög lítið um nóttina svo ég er vel syfjuð í dag þar sem ég gat ekki náð upp svefninum í nótt. Er svo að vinna 12 tíma í dag en ætla svo samt að reyna að vera dugleg og mæta í ræktina eftir það   Nú þýðir ekkert að gefast upp fyrst ég er aftur orðin 68 kg, nú vil ég bara fara að sjá þá tölu fara að mjakast niður Það væri allavega mjög óskandi að það gerðist þessa vikuna fyrst ég er að fara út í næstu viku. Verður samt kannski erfitt þar sem ég þarf að “kveðja” allan góða matinn núna áður en ég flyt hehe, er það ekki alveg nauðsynlegt? Reyni nú að hafa allt í hófi samt, ekkert vit í öðru

- Maríubjalla, sem er zzz..

Ekkert rugl

Þyngd: 69 kg

Ég lokaði augunum áður en ég steig á vigtina í morgun því ég var svo handviss um að ég væri orðin 70 kg. Ég varð því mjög fegin að svo var ekki, í bili a.m.k., svo ég sætti mig alveg við að vera enn 69. Ég ÆTLA ekki að verða 70 aftur, það er bara ekki sjéns, má ekki gerast.

Það er samt leiðinlegt að hætta að lifa lífinu og leyfa sér hluti svo ég ákvað að ég ætla ekki að neita mér um góðan mat eða nammi eða svoleiðis því það er bara leiðinlegt. Það er miklu betra að leyfa sér það í litlu magni og vera bara duglegur í ræktinni í staðinn Við skvísurnar í vinnunni ákváðum t.d. að leyfa okkur pizzu í hádeginu í dag svona í tilefni föstudags og ég ætla ekkert að sjá eftir því heldur bara taka vel á því á eftir frekar Þannig skipulag hentar mér og örugglega flestum öðrum nammigrísum mun betur, þannig nú bíð ég bara spennt eftir pizzunni og hlakka til að brenna henni burt á eftir á góðri æfingu. Það er náttúrulega líka mun betra að borða þetta óholla fyrri part dags heldur en seint á kvöldin svo það er líka plús  ;)

Svo er stefnan bara sett á 68 kílóin og ég ætla mér að sjá þá tölu innan viku, já takk

Hafið það gott!

- Maríubjalla

.. eða ekki

Ég þorði ekki að vigta mig í morgun. Ég var búin að vera voða dugleg um daginn, fór í ræktina um morguninn fyrir vinnu og var í góðum gír. Nema svo hitti ég vinkonu mína um kvöldið og eyðilagði allt.. Við borðuðum saman og vorum báðar svo þreyttar og latar eftir daginn að við duttum í pizzu og keyptum okkur líka nammi :/ Úff úff, og það á miðvikudegi..  En það þýðir ekki að hugsa um það, það er búið og gert og ekkert annað í stöðunni en að halda áfram jákvæðninni og reyna að halda sig á mottunni

Er reyndar eitthvað ótrúlega þreytt og hálf slöpp líka svo ég þarf að sjá til með ræktina í dag, það kemst hvort eð er ekki mikið í verk ef maður er með hausverk og illa upplagður.. Verð að viðurkenna að ég akkúrat núna heldur ekki að nenna neinu og er mjög stutt frá því að gefast bara upp og gefa skít í kílóin, en svo er alltaf samviskan sem togar mann aðeins í hina áttina svo þetta er voða erfitt tímabil núna eitthvað. En ég meika bara ekki tilhugsunina að verða óþekkjanleg þegar ég kem heim um jólin því ég er svo útblásin svo ég hugsa að það sé nógu sterk tilfinning til að ég reyni að halda áfram á beinu brautinni. En þetta er voða erfitt þegar maður sveiflast svona á milli jákvæðni og uppgjafar..

En svona er þetta bara, þarf greinilega að fara að leita að staðfestunni aftur, hún hlýtur að leynast þarna einhvers staðar

- Maríubjalla, sem nennir ekki að hugsa

Þá byrjar alvaran aftur..

Þyngd:  69 kg

Úff hvað ég hafði það of gott um helgina. Ég verð að viðurkenna að það kom mér á óvart að ég hafi bara þyngst um eitt kíló miðað við ógeðið sem ég lét ofan í mig, svo að það var ekki eins vont að sjá þessa tölu í þetta sinn

Ég hef samt fulla trú á því að það láti sig hverfa fljótlega þegar maður kemst aftur inn í daglegu rútínuna Á fimmtudaginn ætla ég að vera orðin 68 kg aftur svo ég geti farið ágætlega sátt inn í helgina. Það er því ekkert nema rækt og dugnaður næstu daga og afeitrun eftir allt nammið um helgina

- Maríubjalla, sem er ótrúlega fegin að það sé stutt vinnuvika

Góða helgi!

Þyngd: 68 kg

Jæja, mér sýnist ég hafa náð að stoppa þetta kíló til að setjast að, í bili allavega

Það er kominn rosalegur helgarfílingur í mig, hlakka til að eyða henni úti á landi í góðra vina hópi Finnst reyndar ekkert voðalega þægileg tilhugsun að komast ekkert í ræktina í fjóra daga en það sleppur vonandi ef ég verð ekki of dugleg í nammiskálinni

En ég ætla nú bara að hafa þetta stutt í dag og segi bara góða helgi og hafið það gott um verslunarmannahelgina!

- Maríubjalla